Nəqliyyat Nazirliyinin sifarişi ilə Hollandiyanın "Royal Haskoning BV" şirkəti tərəfindən "Yeni Bakı Beynəlxalq Dəniz Ticarət Limanı kompleksi"nin Baş Planı və İşçi layihəsi başa çatdırılıb və layihə işlərinə 8,2 milyon manat, o cümlədən 2010-cu ildə 3,2 milyon manat vəsait xərclənib. Bu barədə nəqliyyat naziri Ziya Məmmədov Yeni Azərbaycan Partiyasının rəsmi saytına müsahibəsində bildirib.

Ziya Məmmədov bildirib ki, Bakının Qaradağ rayonunun Ələt qəsəbəsinin ərazisində inşa edilən liman kompleksinin ərazisinin 400 hektar olacağı nəzərdə tutulur. Tikinti işləri üç mərhələdə aparılacaq. Birinci mərhələ 3 il 6 ay ərzində reallaşdırılacaq. İlkin mərhələdən sonra liman kompleksində ildə 10 milyon tona qədər yük və TEU standartlarında 40 min konteyner işləniləcək. İkinci mərhələdə bu rəqəmlər müvafiq surətdə 17 milyon tona və 150 min konteynerə çatdırılacaq.

Üçüncü mərhələdə isə limanın yükaşırımı gücü ildə 25 milyon tona və 1 milyon konteynerə bərabər olacaq. Layihə çərçivəsində avtomobil və dəmir yolları, giriş kanalı, körpülər, bərə terminalı, quru yük terminalı, konteyner sahəsi və sair inşa olunacaq. Nazir limanın məhz, bu ərazidə yaradılmasında əsas məqsədin Azərbaycanda nəqliyyatın təhlükəsizlik məsələlərini uğurla həll etmək, Bakını Xəzər hövzəsində çox müasir və böyük logistika, nəqliyyat mərkəzinə çevirmək Bundan başqa Xəzəryanı ölkələr arasındakı əməkdaşlığı dərinləşdirmək və nəticədə Şimal-Cənub və Şərq-Qərb nəqliyyat dəhlizlərinin tam gücü ilə işləməsinə şərait yaratmaqdan ibarət olduğunu vurğulayıb.

Xatırladaq ki, "Yeni Bakı Beynəlxalq Dəniz Ticarət Limanı kompleksi"nin tikintisi üzrə təməlqoyma mərasimi 2010-cu il noyabr ayının 3-də Azərbaycan Respublikasının Prezidenti cənab İlham Əliyevin iştirakı ilə keçirilib.