Dünən Unibank Premyer-Liqasının 6-cı turunun üç oyunu keçirilib. Mərkəzi görüş "Qarabağ"la
"Xəzər Lənkəran" arasında olub.
Qarşılaşma Tofiq İsmayılov adına Suraxanı qəsəbə stadionunda keçirilib.
Matç 1:0 hesabı ilə lənkəranlıların xeyrinə başa çatıb. Yeganə qolu
40-cı dəqiqədə Adrian Pit vurub. 62-ci dəqiqədə "Xəzər Lənkəran" və
Azərbaycan milli komandasının futbolçusu Elnur Allahverdiyev meydandan
qovulub. "Xəzər Lənkəran" beşinci qələbəsini qazanıb və liderliyini
inamla davam etdirir.
"Simurq" Zaqatalada 5 turdan sonra turnir cədvəlinin 3-cü pilləsində
qərarlaşan "Kəpəz"i qəbul edib. Buna baxmayaraq, gəncəlilər meydan
sahiblərinə məğlub olmaqdan qaça bilməyib. "Simurq" 4:2 hesabı ilə
qələbə qazanıb. "Simurq"un qollarını 6-cı dəqiqədə Robertas Poşkus, 33
və 70-ci dəqiqələrdə Yevgeni Şmakov, 80-ci dəqiqədə Tofiq Mikayılov
vurub. Qonaqların heyətində isə 20-ci dəqiqədə Yuri Fomenko, 78-ci
dəqiqədə Armand Feutçine fərqləniblər . Oyunda üç qırmızı vərəqə
göstərilib - 44-cü dəqiqədə Razvan Tarlea, 66-cı dəqiqədə İlham
Qırtımov, 72-ci dəqiqədə isə Ceyhun Sultanov meydandan qovulublar.
Günün son matçı isə Şüvəlanda oynanılıb. AZAL "İnter"i qəbul edib.
Georgi Boqyunun 46-cı dəqiqədəki qoluna, qonaqlar 86-cı dəqiqədə
Vladimir Levinin topuyla cavab verib və qarşılaşma 1:1 hesabı ilə başa
çatıb.
Bu gün turun daha üç matçı keçiriləcək: "Turan" - "Bakı" (başlama saatı
- 16:00), "Rəvan" - "Sumqayıt Şəhər" (17:00), "Neftçi" - "Qəbələ"
(18:30).
Turnir cədvəli:
1. "Xəzər Lənkəran" - 16 xal (6 oyun)
2. "Qəbələ" - 11 (5)
3. "İnter" - 10 (6)
4. "Kəpəz" - 9 (6)
5. "Bakı" - 8 (5)
6. AZAL – 8 (6)
7. "Qarabağ" - 7 (5)
8. "Neftçi" - 6 (4)
9. "Turan" - 6 (5)
10. "Simurq" - 5 (6)
11. "Rəvan" - 2 (5)
12. "Sumqayıt Şəhər" - 1 (5)
|