Baş prokuror yanında Korrupsiyaya qarşı Mübarizə
İdarəsində müavin ştatları artırılıb. Belə ki, Prezidentin imzaladığı
"Azərbaycan Respublikasının Baş prokuroru yanında Korrupsiyaya qarşı
Mübarizə İdarəsinin Əsasnaməsi”ndə dəyişiklik edilməsi haqqında Fərmanla
İdarədə əlavə müavin postları müəyyənləşib. Modern.az bildirir
ki, dövlət başçısnını imzaladığı fərmanla "Azərbaycan Respublikasının
Baş prokuroru yanında Korrupsiyaya qarşı Mübarizə İdarəsinin
Əsasnaməsi”nə dəyişiklik edib. Belə ki,
Əsasnamənin 17-ci və 20-ci bəndlərinə edilən dəyişiklik nəticəsində
əvvəllər İdarə rəisinin bir müavini nəzərdə tutulurdusa, dəyişiklikdən
sonra bu ştatın sayı artırılıb. Qeyd edək ki,
Azərbaycan Respublikasının Baş prokuroru yanında Korrupsiyaya qarşı
Mübarizə İdarəsi "Korrupsiyaya qarşı mübarizə haqqında” Azərbaycan
Respublikasının Qanununun tətbiq edilməsi barədə” Prezidentin 03 mart
2004-cü il tarixli sərəncamı ilə yaradılıb. Ölkə başçısının 28
oktyabr 2004-cü il tarixli fərmanı ilə Baş prokuror yanında Korrupsiyaya
qarşı Mübarizə İdarəsinin Əsasnaməsi və prokurorluq işçilərinin ümumi
say tərkibi təsdiq edilib. İdarənin əsas
vəzifələrinə korrupsiya ilə əlaqədar hüquqpozmalara dair daxil olmuş
məlumatlara baxıb araşdırma aparmaq, korrupsiya ilə bağlı cinayətlərlə
əlaqədar cinayət işi başlayıb ibtidai istintaq aparmaq, həmin
cinayətlərin qarşısının alınması, aşkar edilməsi və açılması məqsədi ilə
əməliyyat-axtarış fəaliyyətinin həyata keçirilməsi üçün tədbirlər
görmək, korrupsiyaya qarşı mübarizənin səmərəliliyinin artırılması üçün
təklif və tövsiyələr hazırlamaq və sair daxildir. Baş prokuror
yanında Korrupsiyaya qarşı Mübarizə İdarəsinin fəaliyyətinə ümumi
rəhbərliyi Azərbaycan Respublikasının Baş prokuroru həyata keçirir.
Korrupsiyaya qarşı mübarizə idarəsinin İstintaq, Analitik-informasiya
və Daxili təhqiqatlar şöbələrindən ibarət strukturu və həmin şöbələrin
əsasnamələri təsdiq edilib. İstintaq şöbəsinin vəzifələrinə cinayət
işləri üzrə ibtidai istintaq aparmaq, Analitik-informasiya şöbəsinin
vəzifələrinə korrupsiya ilə əlaqədar hüquqpozmalara dair daxil olmuş
məlumatlara baxmaq və araşdırma aparmaq daxildir. Daxili təhqiqatlar
şöbəsi prokurorluqda idarədaxili nəzarət funksiyalarını həyata
keçirməklə yanaşı, korrupsiya ilə bağlı cinayətlərin qarşısının
alınması, aşkar edilməsi və açılması məqsədi ilə əməliyyat-axtarış
tədbirlərinin aparılması üçün tədbirlər görmək vəzifələrini yerinə
yetirir. Korrupsiya ilə bağlı
cinayətlərin qarşısının alınması, aşkar edilməsi və açılmasında
əməliyyat-axtarış tədbirlərinin səmərəliliyinin artırılması məqsədi ilə
əməliyyat-axtarış fəaliyyəti subyekltərinin korrupsiyaya qarşı mübarizə
sahəsində ixtisaslaşmış və bu sahədə təcrübəyə malik olan əməkdaşları
Baş prokurorun müraciəti əsasında əməliyyat-axtarış subyektlərinin
rəhbərləri tərəfindən İdarəyə ezam edilirlər. Əməliyyat-axtarış
fəaliyyəti subyektlərinin qanunvericiliklə müəyyən olunmuş səlahiyyət
bölgüsünə uyğun olaraq İdarəyə ezam edilmiş əməkdaşları İdarə rəisinin
tapşırıqlarını icra edir və görülmüş tədbirlər barədə ona məlumat
verirlər. İdarənin strukturu və onun tərkibində
yaradılan söbələrin səlahiyyətləri Azərbaycan Rеspublikasının
qanunvеriciliyinə və bu Əsasnaməyə müvafiq olaraq Baş prоkurоr
tərəfindən müəyyən еdilir. Əsasnamənin
adı çəkilən 17 bəndində qeyd olunur ki, İdarə rəisinin müavini və
İdarənin digər işçiləri İdarə rəisinin təqdimatına əsasən Baş prоkurоr
tərəfindən vəzifəyə təyin еdilir və vəzifədən azad еdilir. İndi buradakı
"müavini” sözləri "müavinləri” ilə əvəz edilib. 20
bənddə isə göstərilir ki, İdarə rəisi olmadıqda onun vəzifələrini İdarə
rəisinin müavini icra edir. Bu dəyişiklikdən sonra həmin səlahiyyət
bütün müavinlərə aid ediləcək. Qeyd edək ki,
hazırda Baş Prokuror yanında Korrupsiyaya qarşı Mübarizə Idarəsinin
rəisi Kamran Əiliyevdir. 2007-ci ildə bu vəzifəyə təyin edilən K.Əliyev
bundan əvvəl Baş Prokurorluqda dövlət ittihamının müdafiəsi idarəsinin
rəisi işləyib. İdarə rəisnin müavini isə İlqar Abbasovdur. İlqar
Abbasov bu vəzifəyə qədər Baş prokurorun köməkçisi vəzifəsini tutub.
2009-cu ilin avqustundan İlqar Abbasov tutduğu vəzidəfən azad edilərək,
Baş prokuror yanında Korrupsiyaya Qarşı Mübarizə İdarəsinin rəis müavini
vəzifəsinə təyin edilib. Baş prokurorunun
əmri ilə Korrupsiyaya Qarşı Mübarizə İdarəsinin nəzdində "161" nömrəli
"qaynar xətt" əlaqə mərkəzi yaradılıb. Bu il martın 3-dən fəaliyyətə
başlayan "qaynar xətt" əlaqə mərkəzi istirahət və bayram günləri də
daxil olmaqla, sutkada 24 saat fasiləsiz işləyir. Məqsəd
vətəndaşlara korrupsiya hüquqpozmaları barədə şəhərlərarası, respublika
daxili və mobil telefonlar vasitəsilə həmin mərkəzə ödənişsiz zəng etmək
üçün texniki imkanlar yaratmaqdır. Xaqani Səfəroğlu
|