Главная » 2011 » Май » 11 » Avropa Şurası Nazirlər Komitəsinə sədrlik Türkiyədən Ukraynaya keçib
16:48 Avropa Şurası Nazirlər Komitəsinə sədrlik Türkiyədən Ukraynaya keçib |
Bu gün İstanbulda Avropa Şurasına
üzv olan 47 ölkənin xarici işlər nazirləri və Avropa məsələləri üzrə
dövlət katibləri səviyyəsində Avropa Şurası Nazirlər Komitəsinin
toplantısı keçirilib. APA-nın Avropa
bürosunun xəbərinə görə, Türkiyənin xarici işlər naziri Əhməd
Davudoğlunun rəhbərliyi ilə keçirilən toplantıda quruma sədrlik
Türkiyədən Ukraynaya keçib.
Ə. Davudoğlu ölkəsinin AŞ NK-da 6 aylıq sədrliyi dövründə gördüyü işlər
barədə hesabatla çıxış edib. Sonra sədrliyi qəbul edən Ukraynanın xarici
işlər naziri Konstantin Qrişşenko qurumda sədrlik edəcəyi dönəm üçün
ölkəsinin əsas prioritetlərini açıqlayıb.
Toplantıda iki əsas məsələ müzakirə edilib: Avropa Şurasının Avropada və
dünyada qadınlara, ailə içi zorakılığa qarşı Konvensiyası və qurumun
"Görkəmli şəxsiyyətlər” qrupunun "XXI əsrdə birgə yaşamaq” adlı
hesabatı.
Qadınlara və ailə içi zorakılığa qarşı Konvensiya iclasın əvvəlində üzv
dövlətlərin imzasına açıq elan olunub. Qadınlara qarşı fiziki və cinsi
zorakılıq, zorlama, zorla evləndirmə, qadın sünnəti və namus
məsələlərindən irəli gələn cinayətlər kimi mövzularla əlaqədar
müddəaları özündə ehtiva edən bu sənədin icrasına nəzarət etmək üçün
yoxlama mexanizmi də nəzərdə tutulur. Yaradılacaq monitorinq mexanizmi
daxilində sənədə qoşulan dövlətlərə nizamlı yoxlama səfərləri təşkil
edilərək qadına qarşı və ailə içi zorakılıqla bağlı sənədin
müddəalarından irəli gələn öhdəliklərin icrası haqqında hesabatlar
hazırlanacaq. Konvensiyaya qoşulmuş dövlətlər Avropa Şurasının digər
nəzarət orqanlarında olduğu kimi, bu hesabatlarda da əks olunan
tövsiyələri yerinə yetirmək barədə öhdəlik götürmüş olacaq.
İstanbuldakı iclasda AŞ-nin "Görkəmli şəxsiyyətlər” qrupunun "XXI əsrdə
birgə yaşamaq” adlı hesabatı da təqdim olunub. Birgə yaşamaq və XXI əsr
Avropasında fərqlilikləri və azadlıqları uzlaşdırmaq mövzusunda
hesabatını təqdim edən qrupun İspaniyadan olan üzvü Havyer Solana
Avropada diskriminasiya, qeyri-tolerantlıq və irqçiliyi yaradan
problemlərdən danışıb. Bu hesabat Avropada açıq cəmiyyətlərdə birgə
yaşamaq üçün ortaya çıxan təhlükələri analiz edir və onlara verilə
biləcək mümkün cavabları təklif edir.
On nəfərdən ibarət olunan AŞ-nin "Görkəmli şəxsiyyətlər” qrupuna
Almaniyanın keçmiş xarici işlər naziri Yoşka Fişer rəhbərlik edir.
Xatırladaq ki, AŞ NK-ya sədrlik 6 aydan bir dəyişir, sədrlik quruma üzv
ölkələrə əlifba sırası ilə keçir. Nazirlər Komitəsinin növbəti sessiyası
2011-ci ilin noyabr ayında Strasburqda keçiriləcək. Quruma sədrlik
Ukraynadan Birləşmiş Krallığa ötürüləcək.
|
Просмотров: 269 |
Добавил: apacenub
| Рейтинг: 0.0/0 |
|
Statistika
Онлайн всего: 1 Гостей: 1 Пользователей: 0
|