Masallı. Ağəddin Babayev – APA. Lerik rayon sakinini vuraraq hadisə yerindən qaçmış avtomobilin sürücüsü tutularaq istintaq orqanlarına təhvil verilib. Bu barədə məlumatı APA-nın cənub bürosuna Masallı Rayon Polis Şöbəsinin (RPŞ) müstəntiqi Elvin Əzimov verib. Onun sözlərinə görə, yanvarın 5-də gecə saat 21.30 radələrində rayonun Qızılağac kəndi ərazisində müəyyən edilməmiş avtomobillə piyada, Lerik rayonunun Nücü kənd sakini, 1952-ci il təvəllüdlü Güloğlan Baloğlan oğlu Teymurov vurulub. Nəticədə G.Teymurov aldığı çoxsaylı bədən xəsarətlərindən hadisə yerindəcə dünyasını dəyişib. Masallı RPŞ əməkdaşlarının həyata keçirdikləri əməliyyat-axtarış tədbirləri sayəsində piyadanı vuraraq hadisə yerindən qaçmış avtomobilin sürücüsünü isti izlərlə saxlamaq mümkün olub. İstintaqla hadisənin Masallı rayonunun Qızılağac kənd sakini, 1987-ci il təvəllüdlü Vasif Əliəfsər oğlu Əliyevin idarə etdiyi "VAZ-2107” markalı, 10 JK 791 dövlət nömrə nişanlı avtomobillə törədildiyi müəyyənləşdirilib.

Faktla bağlı Masallı RPŞ-də cinayət işi açılıb, araşdırma aparılır.