Lənkəranda güclü yanğın hadisəsi baş verib. Fövqəladə Hallar Nazirliyinin (FHN) Lənkəran Rayon Yanğından Mühafizə Hissəsindən APA-nın Cənub bürosuna verilən məlumata görə, hadisə bu gün səhər saatlarında şəhərin Axundzadə küçəsi,10 ünvanında yaşayan İlham Firuz oğlu Əhmədova məxsus fərdi yaşayış evində qeydə alınıb. Yanğın baş verən zaman 4 nəfərlik ailə mənzildə yatdığından hadisədən xəbərsiz olub. Qonşunun hadisədən xəbər tutması ilə evin sakinləri, o cümlədən iki azyaşlı körpə faciədən qurtula bilib.

Hadisə yerinə dərhal FHN-nin Lənkəran Rayon Yanğından Mühafizə Hissəsinin 3 yanğınsöndürən maşını və canlı qüvvəsi cəlb olunub. Təxminən bir saat ərzində yanğın tamamilə lokallaşdırılaraq, onun qonşu tikililərə keçməsinin qarşısı alınıb. Bununla belə,  ümumi sahəsi 85 kvadratmetr olan 4 otaqlı ev yanğın nəticəsində yaşayış üçün yararsız hala düşüb.

      İlkin ehtimallara görə, yanğın elektrik naqillərindəki qısaqapanma səbəbindən baş verib. Hadisənin dəqiq səbəbi isə mütəxəssislərinin araşdırmalarından sonra məlum olacaq.