Cəlilabad. Ağəddin Babayev – APA. Azərbaycanın Cəlilabad rayonunda yanğın hadisəsi baş verib. Rayon mərkəzindən 25 km. aralıda yerləşən dağlıq Ləkin kənd sakinlərinin APA-nın Cənub bürosuna verdikləri məlumata görə, hadisə ötən gün bu yaşayış məntəqəsininin Hamarküçə məhəlləsindəki məsciddə qeydə alınıb. Belə ki, sübh namazına gələn dindarlar məsciddə güclü yanğının şahidi olublar. Onların yanğını lokallaşdırmaq üçün göstərdikləri səylər isə heç bir nəticə verməyib. Yanğın nəticəsində ibadətgahın kişi və qadınlara aid iki otağı, həmçinin mətbəxi içindəki əşyalarla birlikdə yanaraq yararsız hala düşüb. Maraqlıdır ki, həmin əşyalarla birlikdə saxlanılan müqəddəs "Qurani Kərim”ə isə heç bir xətər toxunmayıb.

İlkin ehtimala görə, məsciddəki yanğına odun sobasının,  ya da elektrik naqillərində qısaqapanmanın səbəb olduğu bildirilir.

Fövqəladə Hallar Nazirliyinin Cəlilabad Rayon Yanğından Mühafizə Hissəsindən isə APA-nın yerli bürosuna Ləkin kəndində məciddə yanğın hadisəsinin baş verməsi barədə onlara hər hansı məlumatın daxil olmadığı bildirilib.