Masallı. Ağəddin Babayev – APA. Ötən gecə saat 23.00 radələrində Masallıda güclü yanğın hadisəsi baş verib. APA-nın cənub bürosunun məlumatına görə, hadisə  şəhərin ərazisində yerləşən məşhur “Embawood” mebel istehsalı fabrikinə məxsus anbarda qeydə alınıb.  Hadisə yerinə dərhal Fövqəladə Hallar Nazirliyinin Masallı Rayon Yanğından Mühafizə Hissəsinin 3 yanğınsöndürən maşını və canlı qüvvəsi göndərilib. Lakin yanğın şiddətləndiyindən və əhatə dairəsi getdikcə genişləndiyindən qonşu Lənkəran, Cəlilabad, Biləsuvar rayonlarından, həmçinin Göytəpə şəhərindən  hadisə yerinə əlavə olaraq yanğınsöndürən briqadalar cəlb edilib. Lakin yanğınla 10 saatdan mübarizəyə baxmayaraq, onu hələ də lokallaşdırmaq mümkün olmayıb. Yanğının böyük bir ərazini əhatə etdiyi və müəssisəyə xeyli ziyanın dəydiyi bildirilir.