Lənkəran. Ağəddin Babayev – APA. Daha bir əcnəbi futbolçu "Xəzər Lənkəran”  komandasının tərkibindən uzaqlaşdırılıb. APA-nın Cənub bürosunun məlumatına görə, əvvəllər Turkiyə Superligasında çıxış edən və bu ilin avqust ayında Mersin İdman Yurdu Klubundan "Xəzər Lənkəran”  klubuna transfer edilən 31 yaşlı Beto ləqəbli braziliyalı hücumçu Andre Roberto Suares da Silva ümidləri doğrultmadığı üçün komandanın heyətindən xaric olunub. Belə ki, "Xəzər Lənkəran”ın heyətində 5 rəsmi oyunda çıxış edən braziliyalı forvard bu oyunların heç birində fərqlənə bilməyib. Hücümçü yalnız komandanın "Kəpəz”lə oynadığı yoldaşlıq görüşündə qapı torunu iki dəfə silkələməyə macal tapıb. Bu, Betonun "Xəzər Lənkəran”ın heyətində fərqləndiyi yeganə oyun olub.

Qeyd edək ki, klubla Andre Roberto Suares da Silvanın əməkdaşlığına qarşılıqlı razılıq şəklində son qoyulub.