Prezident İlham Əliyevin 7 iyul 2011-ci il tarixli sərəncamı ilə təsdiq edilmiş "Azərbaycan gəncliyi 2011-2015-ci illərdə” Dövlət Proqramına müvafiq olaraq bu ildən etibarən respublikanın regionlarında arxeoloji düşərgələrin təşkilinə başlanıb. APA-nın Cənub bürosunun məlumatına görə, Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutu ilə Gənclər və İdman Nazirliyinin birgə təşkilatçılığı ilə ilk belə arxeoloji düşərgə iyul ayında Qəbələ rayonunda fəaliyyət göstərib. Növbəti düşərgə isə Lerik rayonunun Gürdəsər kəndi ərazisində təşkil olunub. Gəncləri vətənpərvərlik ruhunda tərbiyə etmək, onları Azərbaycan tarixi haqqında məlumatlandırmaq məqsədi daşıyan düşərgədə ölkənin müxtəlif ali təhsil müəssisələrinin 50 -ə yaxın tələbəsi cəmləşib. Bir həftəlik müddətdə onlar Gürdəsər kəndindəki qədim qəbiristanlıqda arxeoloji qazıntı işlərinə cəlb olunacaqlar.

Düşərgənin müddəti bitəndən sonra tələbə gənclərə  sertifikatlar təqdim olunacaq.