Lənkəran. Ağəddin Babayev – APA. Noyabrın
30-da Lənkəran şəhər 4 saylı humanitar təmayüllü məktəb-liseydə Azərbaycanın
istiqlal şairi Əhməd Cavadın 120 illik yubileyinə həsr edilən "Sən öylə
bir şeyirsən ki, sevməyənlər anlamaz" adlı elmi-praktiki konfrans keçirilib. APA-nın Cənub bürosunun məlumatına görə, Azərbaycan Reespublikasının
Dövlət Himni səsləndirildikdən sonra tədbiri giriş sözü ilə Lənkəran Şəhər Təhsil
Şöbəsinin müdir müavini Güloğlan Bağırov açıb.
Lənkəran Dövlət
Universitetinin "Dil və ədəbiyyat” kafedrasının müdiri, dosent, Yazıçılar
Birliyinin üzvü Yədulla Ağazadə "İstiqlal şairi Əhməd Cavadın həyat və
yaradıcılıq yolu” mövzusunda geniş məruzə edib. Bildirilib ki, 1892-ci il mayın 5-də Gəncə qəzasının Şəmkir dairəsinin
Seyfəli kəndində anadan olmuş şair Gəncə ruhani seminariyasında və Azərbaycan
Ali Pedaqoji İnstitutunun tarix və filologiya fakültəsində təhsil alıb. 45
illik həyatı boyu çox məşəqqətli ömür yolu keçən Əhməd Cavadın qəlbi daim Azərbaycanı
müstəqil, doğma xalqını xoşbəxt görmək istəyi ilə döyünüb. Nəticə etibarilə
şair günahsız olmasına baxmayaraq, haqsız həbs edilib, dəhşətli işgəncələrə məruz
qalıb və 1937-ci ildə imperiyanın amansız cinayətinin qurbanı kimi həyatdan vaxtsız
köçüb.
Məruzə
ətrafında çıxışlarda filologiya üzrə fəlsəfə elmləri doktoru, Prezident təqaüdçüsü,
Yazıçılar Birliyinin üzvü Mirhaşım Talışlı, Liman şəhər 2 saylı tam orta məktəbin
dil-ədəbiyyat müəllimi Rəqsanə Xasıyeva, Liman şəhər 1 saylı tam orta məktəbin
dil-ədəbiyyat müəllimi Əfayət Əsədova, şəhər 8 saylı tam orta məktəbin dil-ədəbiyyat
müəllimi Münasib Nuriyev və digərləri fikir və düşüncələrini ifadə ediblər. Bütün
çıxışlarda həyatı boyu xalqımızın müstəqillik ideallarına sadiq qalan Əhməd
Cavad poeziyasında yeni bir ədəbi məktəbin bünövrəsi qoyulduğu, şairin zəngin
yaradıcılığının sonrakı nəslin milli azadlıq və istiqlal uğrunda mübarizə təfəkkürünün
inkişafında xüsusi rolu dönə-dönə qeyd olunub.
Tədbirdə
həmçinin məktəblilərin ifasında Əhməd Cavadın şeirləri və sözlərinə bəstələnmiş
mahnılar səsləndirillib, iştirakçılara ədəbi-bədii kompozisiya təqdim edilib.
Qeyd
edək ki, tədbir Azərbaycan Respublikasının prezidenti İlham Əliyevin "Əhməd
Cavadın 120 illik yubileyinin keçirilməsi haqqında” imzaladığı sərəncamına əsasən
təşkil olunub.
|