Lənkəran. Ağəddin
Babayev – APA. Avqustun 18-də Dövlət Sərhəd Xidmətinin (DSX) Lənkəran Sərhəd Dəstəsində
gənc əsgərlərin andiçmə mərasimi keçirilib. APA-nın cənub bürosunun məlumatına
görə, şəxsi heyətin, valideynlərin və
ictimaiyyət nümayəndələrinin qatıldığı tədbiri giriş sözü ilə açan Lənkəran Sərhəd
Dəstəsinin komandiri, polkovnik-leytenant Elşən Mirzəyev Sərhəd Qoşunlarının yaranmasının
94 illiyi münasibəti ilə hamını təbrik etməklə, hərbi andın hər bir əsgərin həyatında
əlamətdar və unudulmaz bir hadisə olduğunu bildirərək, onları Vətənin sərhədlərinin
keşiyində ayıq-sayıq durmağa çağırıb. Dəstə komandiri çıxışında həmçinin Azərbaycanda
ordu quruculuğu sahəsində həyata keçirilən məqsədyönlü islahatlardan, sərhəd
qoşunlarının formalaşması və inkişafına göstərilən dövlət qayğısından da söz
açıb.
Daha
sonra gənc əsgərlərin hərbi anda gətirilməsi komandası verilib. Hərbi anda gətirilən
əsgərlər hərbi andı qəbul edərək Vətənə sədaqət andı içiblər.
Andiçmə mərasimində
çıxış edən valideynlər övladlarına komandirlərin əmrlərinə
tabe olmağı, Vətənin keşiyində hər an sərvaxt dayanmağı tövsiyə ediblər.
Mərasimdə bir qrup
zabit layiqli xidmətinə görə rütbələrlə, medallarla və fəxri fərmanlarla təltif
olunublar. Sonda şəxsi heyət təntənəli marşla
tribunanın önündən keçib.
|