Lənkəran. Ağəddin Babayev – APA. Bu gün Lənkəran Ağır Cinayətlər Məhkəməsində Zərdab rayon Prokurorluğunun sabiq müstəntiqi Rüfət Səfərovun barəsində olan cinayət işi ilə bağlı məhkəmənin baxış iclası keçirilib. APA-nın cənub bürosunun məlumatına görə, hakim Asim Hacıyevin sədrliyi ilə keçirilən iclasda prokuror ittiham aktı oxuyub. Təqsirləndirilən Rüfət Səfərov ona qarşı irəli sürülmüş ittihamı rədd edib.
Daha sonra məhkəmə şahid ifadələri ilə davam etdirilib.
R.Səfərovun cinayət işi üzrə növbəti məhkəmə iclası sentyabrın 7-ə təyin olunub.
Qeyd edək ki, bu il yanvarın 15-də Binəqədi rayon Məhkəməsinin qərarı ilə R. Səfərov barəsində 4 ay müddətinə həbs-qətimkan tədbiri seçilib. Həmin qərardan məhkəməyə müraciət olunaraq həbs qərarının ev dustaqlığı ilə əvəz olunması istənilib. Yanvarın 22-də onun müraciətinə Binəqədi rayon Məhkəməsi tərəfindən baxılıb və barəsində seçilmiş həbs qətimkan tədbiri ev dustaqlığı ilə əvəzlənib.
R. Səfərov Cinayət Məcəlləsinin 311-ci (rüşvət alma) maddəsi ilə təqsirləndirilir.
Xatırladaq ki, R. Səfərov Müdafiə Nazirliyinin mətbuat xidmətinin keçmiş rəisi Eldar Sabiroğlunun oğludur.
|