Lənkəran. Ağəddin Babayev – APA. İran İslam Respublikasından Azərbaycana mədəsində narkotik vasitə olan tiryək keçirmiş Lənkəran şəhər sakini yaxalanıb. Bu barədə məlumatı APA-nın Cənub bürosuna Lənkəran Şəhər-Rayon Polis Şöbəsinin (ŞRPŞ) əməliyyat işləri üzrə rəis müavini Qabil Tağıyev verib. Onun sözlərinə görə,  polis əməkdaşlarının həyata keçirdikləri əməliyyat-axtarış tədbirləri zamanı Lənkəran şəhər sakini, 1960-cı il təvəllüdlü  Rafəddin Abbasov şübhəli şəxs qismində saxlanılıb. Şöbədə dindirilmə zamanı məlum olub ki, R. Abbasov İrandan Azərbaycana mədəsində 4 bükümdən ibarət narkotik vasitə olan tiryək keçirib. Narkotik vasitə saxlanılan şəxsin daxili orqanlarından  həkimin müdaxiləsi ilə çıxarılıb. 4 bükümdə olmaqla tiryəkin ümumi çəkisi 27 qram təşkil edib.

Qeyd edək ki, Rafəddin Abbasov əvvəllər də dörd dəfə məhkumluq həyatı yaşayıb.

Faktla bağlı Lənkəran ŞRPŞ-də Cinayət Məcəlləsinin 234.4 madəsi ilə cinayət işi açılıb, araşdırma aparılır.