Lənkəran. Ağəddin Babayev – APA. Aprelin 9-da
Ekologiya və Təbii Sərvətlər naziri Hüseynqulu Bağırov Lənkəranda cənub
bölgəsinin bir qrup sakinini qəbul edib. APA-nın yerli bürosunun məlumatına
görə, rəhbərlik etdiyi qurumun idarə və departamentlərinin iştirakı ilə keçən
qəbul zamanı H.Bağırov Astara, Lənkəran, Lerik, Masallı, Yardımlı, Cəlilabad və
Biləsuvar rayonlarından olan 50-dək vətəndaşın şikayət, təklif və
müraciətlərini dinləyib.
Qəbulda
ətraf mühitin və ekoloji tarazılığın mühafizəsi, meşələrin qorunması,
hidrometrologiya, geologiya, biomüxtəliflik, ətraf mühitin monitorinqi və bu
kimi məsələlər daha çoxluq təşkil edib. Vətəndaşların şikayət və təkliflərini
diqqətlə dinləyən nazir onları narahat edən bəzi məsələlərin yerindəcə həll
olunmasını müvafiq təşkilat rəhbərlərinə tapşırıb. Şikayət xarakterli digər
müraciətlər isə araşdırılaraq tədbir görülməsi və adiyyatı qurumlara
çatdırılması üçün qeydə alınaraq nəzarətə götürülüb.
Ekologiya və Təbii Sərvətlər naziri jurnalistlərə
verdiyi müsahibəsində son zamanlar cənub bölgəsində ekoloji tarazılığın və
təbii sərvətlərin qorunması sahəsində müəyyən işlərin görüldüyünü bildirərək
Hirkan Milli Parkının yaranmasından sonra bu sahəyə diqqətin daha da
gücləndirildiyini vurğulayıb.
Lənkəran-Lerik şosesində baş vermiş torpaq
sürüşmələrinə münasibət bildirən H.Bağırov bu ərazidə yol tikintisi aparılarkən
mühəndis-geoloji tələblərə ciddi riayət olunmasının zəruriliyini qeyd
edib:”Bəzi hallarda isə yerli sakinlər meşə ərazisinin yamaclarını hamarlayaraq
həmin sahədə özlərinə fərdi evlər tikirlər. Belə bir vəziyyət son nəticədə
torpaq sürüşmələrinə rəvac verir”.
|