Lerik
Rayon İcra Hakimiyyətinin (RİH) təşəbbüsü ilə oktyabrın 24-də Lerik şəhərindəki
"Nur” Şadlıq Sarayında tanınmış çoban Xanış Şahıyevin nəvəsi - Qarabağ
döyüşlərində şəhid olmuş Camal Xanış oğlu Şahıyevin övladı Qorxmaz Şahıyevin
toy-ziyafət mərasimi keçirilib. APA-nın Cənub bürosunun məlumatına görə, toyda RİH-nin
başçısı Rövşən Bağırov, hüquq-mühafizə orqanlarının rəhbərləri, ağsaqqallar,
ziyalılar, ictimaiyyət nümayəndələri iştirak edərək, gənclərə xeyir-dualarını
veriblər. Ailə quran gənclərə RİH
tərəfindən hədiyyələr də təqdim olunub.
Lerik
rayonundan Milli Məclisinin deputatı seçilmiş İqbal Məmmədov isə yeni ailə
quran cütlüyü onlar üçün hədiyyə aldığı məişət əşyaları ilə sevindirib.
Qeyd edək
ki, ölkə başçısının tapşırığına əsasən 2007-ci ildə şəhidin ailəsinə Lerik
şəhərində 3 otaqlı mənzil verilib. 2012-ci ildə müraciəti nəzərə alınaraq
Qorxmaz Şahıyev RİH tərəfindən daimi işlə təmin edilib.
Məlumat
üçün onu da əlavə edək ki, Xanış Kamil oğlu Şahıyev
1932-ci ildə Lerik
rayonunda doğulub boya-başa çatıb. Atası İkinci Dünya Müharibəsində həlak olub.
Yetim qalmış Xanış qardaş və bacılarını dolandırmaq üçün erkən yaşlarından
zəhmətə qatlaşıb. Buna görə təhsil almağa imkanı olmayıb. 22 övladından ikisi
Qarabağ uğrunda gedən döyüşlərdə şəhidlik zirvəsinə ucalıb. Xanış kişini
ümummilli lider Heydər Əliyev şəxsən tanıyırdı və onlar yaxın dost
idilər. Xanış Şahıyev 2009-cu ilin aprelində vəfat
edib.
|